撰文、改編：野花
影視製作的分工繁多細密，但凡達到一定規模，都需要團隊支持。團隊埋班的過程，幾乎總會依賴外判制：由導演、技師和獨立製作公司承包不同製作工序，名義上聘請基層人員，最終「話事」的則是投資者和出品人，整個團隊都需要按他們的要求來辦事。外判制令當中的權責變得模糊，資方的責任由最終得益的投資者和出品人，轉移到「判頭」身上，而自由工作的盛行更令基層人員無薪資制度可循。
前情提要：某YT channel將節目製作外判給導演，導演為此物色了編劇合作。Channel沒有講明承包費用便要求導演開工。新入行的導演不好拒絕，便上行下效，在未傾好酬勞和沒有提供「開筆費」之下，要求同是新人的編劇度橋、寫稿。節目出街後，channel仍然拖欠二人的酬勞。編劇向channel追討欠薪，channel卻推諉責任到導演身上⋯⋯
Act 1：追數
編劇：究竟收到個客嘅錢未？我由開始寫稿到而家差唔多半年，條片上個月都出咗街啦，佢拖數喎👿
導演：我畀咗invoice㗎啦，你好等錢洗？
編劇：唔關等唔等錢洗事，就算爭我一百蚊我都要追啦。話説，點解咁遲出invoice？
導演：出咗街唔代表有錢收，行規係咁😓 個客開拍咗幾個月先定實budget，我已經即刻出invoice㗎喇。唉，個數同市價比都有啲少，得幾萬蚊。冇計，已經做咗嘢，惟有硬食……
編劇：幾萬？扣埋成本每人咪得幾千？做咗幾個月喎。如果傾合作嗰陣佢講清楚個價，唔係吹到好大budget咁，我就唔會寫咁多嘢、你都唔會請咁大隊crew啦! 咁樣俾人搵笨好唔gur，要公告天下😡
Act 2：藉口
Youtube channel PR：公司見到你出咗post，話同我哋嘅合作有啲唔愉快，係咪有咩誤會？想瞭解下咩事🙏🙏
編劇：冇誤會，開工前你又唔肯講實條數，到而家做晒嘢、節目出晒街，你都未畀錢。咁仲唔係拖糧？
PR：公司都係收到invoice冇耐，同導演講好一個月內過數，用呢個timeline計，其實無拖你嘅
編劇：出錢係你嘅責任，有冇畀invoice都要㗎啦。你一早confirm畀幾多錢我哋拍，咪唔會好似而家咁遲囉
PR：我哋冇辦法一早confirm budget㗎，你哋要度到一條公司認為拍到嘅橋，講到畀公司聽要咩場地、人手、演員，咁先知需要幾多錢㗎嘛
編劇：咁係本末倒置喎。你決定好投資幾多，我哋咪按budget去度橋囉。你要人哋度到你滿意為止先至confirm價錢，又唔畀開筆費人，咁你咪好著數？我哋咪好冇保障？
PR：公司無法事先判斷你條橋值咩價。唔同片種、長度、內容嘅價值都唔同，要你pitch咗先知
編劇：有乜理由拍晒先知價錢？你嘅講法只係轉嫁緊啲風險畀我，擺明耍我啫
PR：公司本身冇打算請編劇，原意係由導演包辦，係佢自己搵你幫手寫稿。有咩糾紛都唔牽涉公司，你搵返導演處理啦
Act 3：過橋抽板
監製：個編劇咩意思？佢搞大件事，係別有用心，想利用公司去搶眼球喎！佢啲指控影響緊公司聲譽，你同我搞返掂佢
導演：佢只係寫返自己嘅經歷出嚟，夾喺中間我都好尷尬。我已經處理緊，畀多啲時間我🙏
監製：你唔好敷衍我！咩叫夾喺中間？係你唔肯將問題攬上身啫，人係你搵返嚟嘅，就算拖糧都係你拖
監製：定係你想話公司都有責任？你係咪企佢嗰邊？我真係對你好失望，你咁樣做嘢仲邊度有人信得過你？
監製：如果你拆唔掂，我就真係要研究告佢誹謗！
監製：（輸入中……）
Act 4：息事寧人？
導演：監製鬧得我好甘，我就嚟壓力爆煲，食咗好多包煙😭你會唔會考慮del咗個post？
編劇：吓，我都係據理力爭啫
導演：我明白你嘅委屈，但呢件事如果再鬧大，畀人一個印象係我handle唔到自己隊crew嘅話，我嘅career真係會好受影響㗎……你可唔可以多一事不如少一事，當幫我一次？
編劇：（唉⋯⋯好啦）（唔係唔想幫你，但我冇理由要忍）
以上故事改編自真人真事。如有雷同，實屬不幸。 如果你是編劇，你又會如何處理？
Opmerkingen