撰文：地火
Melody（化名）：1 年後製經驗，動畫效果、剪接等，接不同散工
搵工麻煩事
想入行，去Jobs DB搵嘅話大把工，日日都請，TVB同ViuTV係一年365日都請緊PA*，好多production house都會請人，聽佢哋講話，做TVB嘅時候，剪片間房都要同人爭，淨係 book到半夜幾個鐘 |
我學生時候都諗過做Viu嘅 PA，但係PA就係最學唔撚到嘢嘅，幫人叫下外賣啊、玩下excel排rundown、sync*下片，所以其實入去做咗兩年PA，出嚟個叫價能力係咪會好高呢？其實都唔係。除非由PA升到導演，3、4年先升到。我依家間新公司好多電視台出嚟嘅，13K做三四年出嚟，叫價都係15K，做完 Viu出嚟巴屎閉，其實技能都唔係咁高 |
PA：總稱負責雜務的片場工作人員
sync：剪片初期工作，將分開錄製的聲音與畫面調整至同步，達「聲畫合一」
我係新豬肉
接freelance嘅話 ，後期剪接要改好多次。新出嚟嘅，唔知道要寫「限改」幾多次，就俾人無限改 |
係咁用自己嘅時間，但又係嗰嚿錢。一講「全包」就死硬。一開始出嚟做一定會瀨呢啲嘢，啲人又恰鳩你係學生 |
有個舊老細專請學生 intern，佢得一個full time 咋嘛，full time係做咗三年嘅designer，第一年係11K |
我問佢「你會唔會想搵過份工？」，佢話「啱啱簽咗新合約，15K喇」呃，我一過新公司就16.5K。佢仲要唔撚供MPF，full time都唔供 |
外判&追數
之前啲公司唔係辛苦，係錢少。一年可能接得一個細廣告，幫啲公司拍吓片。得做intern嘅時候先有得簽合約。畢業之後，出 crew 就計時薪，同埋係用Payme出糧嘅... |
有間公司offer咗個電視節目剪片job畀我，到佢過數嗰下，先發現比之前口頭講嘅少咗一倍。咁我就選擇相信，可能係佢一開始講錯咗。同佢嘈又冇意思，第一冇record啦，第二就係同佢嘈咗，之後佢有job唔畀我，就自己蝕底。請full time剪片一定唔止呢個價，大啲嘅公司會自己請全職剪片師，有啲廠景talk show好簡單嘅，有時會判出去。理論上佢判晒出去畀人做就最平啦 |
我追之前間公司幾千蚊，係幫某公司剪綜藝片。我問「幾時會出糧啊？」，上司就話「等緊嗰邊過數啊」、「你等錢洗嘅話，我自己出住畀你先？」 DLLM，你係老細你唔出住畀我先，係咪要我同個客追數，叫佢直接出比我？知唔知自己講緊乜撚？我真係等你幾千蚊牙～😠佢咁講係想我唔好追佢囉。呢個係全行都係咁囉，等個客出數，先出畀你。條數拖到節目出街後嘅幾個月囉...上年中出街... 今年初先收到錢 |
我上年剪嗰條片，到依家都未有錢，成三個月。接我個friend間公司嘅job。係幫間教育機構剪片，2至3分鐘。教育機構未畀錢佢，佢就未畀錢我。但我個friend supposed係請我嗰個人吖嘛。但係佢冇畀住錢我先。佢就話「嗰邊好耐先畀錢㗎」全行都係咁....屌.... |
試過有個老細問我剪唔剪下YouTube片，叫我上佢公司傾，其實有咩電話傾咪得。返去又講咗一大輪嘢，喺度遊花園，吹咗15分鐘，有10 分鐘都係講廢話😄但係佢講咗一大輪，都冇講最重要嘅嘢，就係幾錢呢到底？冇講過嘅？佢就話「我大概了解你嘅諗法啦，返去計計條數先」Anyways，我就問佢「大概幾多budget？」佢口頭同我講「一條2至3分鐘嘅Youtube片，你預1000至2000蚊啦」，我話「好啊」過咗兩日，佢WhatsApp咗details畀我—— DLLM係8分鐘片！！！而所謂 2000蚊budget只係有1000多幾嚿！！！ |
最後我冇接到，跟住佢就話「你想要幾多呢？可以傾」。其實都唔係同我傾，佢同自己傾咋嘛。佢話係冇乜 budget 㗎喇，不過長做長有啦。邊個知係咪真係長做長有啫，佢下一條片搵第二個剪我都吹佢唔脹㗎。但其實1000幾蚊一集，我一個月剪4條8分鐘嘅片都係賺4000零蚊，剪接特效字幕全包喎DLLM，合唔合理？？換算做full time，我一星期剪兩條，一個月咪得嗰8000蚊？恰鳩我Fresh grad冇工開喺你度乞食。咁我就話唔剪啦，佢就話「咁遲啲（某大台）開個新project，我諗都唔洗預你啦？」然後佢就del咗 message。可惜我cap唔切圖，SLS |
「夢想？？？」
呢行真係太多人做啦，13K、14K都有人做，而做得影視嘅，學歷都未必高，冇咁多轉行機會。啲龍頭又細，嚟嚟去去幾個監製，下游嘅人好多。賣夢想... |
我為夢想入行，滿足感、開心、興趣 ... ...接受唔到未來四十年喺office度玩excel，惟有玩Premiere* ，俾Adobe玩😂 |
依家就轉咗穩定嘅full time，做AE*，full time冇得壓價，呢間公司大好多，同時間接5、6 個節目。我做後期，得閒好多 |
公司舊年年尾有隊crew*去咗日本拍嘢。導演飛咗過去成個月，chur咗兩個節目，一個月可能得1、 2日係休息，然後一個月有30日chur，係好撚辛苦。因為佢要慳最多錢吖嘛，咁咪唔可以休息囉，如果飛一次可以拍兩個節目，夾埋十幾廿集，咪可以慳返機票錢囉。佢嚟緊要去第二度拍片，又係一次過 chur 兩個節目囉，我覺得好唔人道囉...😳 |
其實我入行預咗再差啲，電視台嗰啲真係好辛苦。我一出嚟就in-house，所以就舒服啲，不過入公司啲價錢又壓低晒 |
每日諗100次要唔要走好...不過搵到freelance嘅話收入會好好多，每個月就額外可以有5000到1萬蚊（當然都可以係0...）今個月就有friend外判 freelance job畀我，好開心！！！ |
Premiere/ AE：Adobe 剪片/ 動畫軟件
Crew：攝影組
תגובות